E ndarë prej tij, por e dhunon sërish – Ish-bashkëshorti godet gruan

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, por edhe nga ish-bashkëshortët, raporton Gazeta Sinjali.

Një rast i tillë është raportuar pasditen e së martës në qytetin e Pejës, ku një burrë dyshohet se ka sulmuar fizikisht ish-gruan e tij, pas një konflikti për vajzën e tyre të mitur.

Burime të Gazetës Sinjali bëjnë me dije se rasti ka ndodhur rreth orës 17:00, në rrugën “Vëllezërit Gërvalla”, ku Policia ka ndërhyrë pas marrjes së një informate për një përleshje.

Në vendngjarje, patrullat policore kanë takuar viktimën, M.D., rreth 42-vjeçare, e cila ishte brenda një lokali dhe e kanë shoqëruar në stacion, ndërsa i dyshuari, A.H., rreth 48-vjeçar, u kap jashtë lokalit dhe u arrestua në vend.

Sipas deklarimeve të viktimës, ajo është e ndarë nga i dyshuari prej dy muajsh dhe më 1 korrik, ai kishte shkuar në shtëpinë e saj për të marrë vajzën, por situata kishte degjeneruar në dhunë fizike. A.H dyshohet se e ka goditur me shuplakë, më pas i ka marrë telefonin nga dora dhe e ka shtyrë drejt murit.

Viktima ka pranuar ndihmën mjekësore dhe pas intervistimit është kthyer në banesën e saj. Ndërkohë, i dyshuari është intervistuar dhe me vendim të Prokurorit të Shtetit, rasti është iniciuar si “Dhunë në familje”.

Rasti mbetet në trajtim të institucioneve kompetente.