Kapet me dru të prerë ilegalisht dhe kanos policët

Zyrtarët policorë kanë qenë dhe vazhdojnë të jenë cak i kërcënimeve nga persona e grupe të ndryshme, që në shumicën e rasteve motivet lidhen edhe me punën e tyre zyrtare. Ngjarje të tilla ndodhin gjatë kohës kur policët janë me uniformë, raporton Gazeta Sinjali.

Kështu mbrëmë, një aksion i Policisë në kuadër të planit operativ “Mbrojtja e Malit të Sharrit” është përshkallëzuar në Kaçanik, pasi një qytetar i dyshuar për prerje ilegale të drunjëve, jo vetëm që nuk iu bind urdhrave të zyrtarëve, por edhe i kanosi rëndë ata gjatë detyrës.

Siç mëson Sinjali, rasti ka ndodhur rreth orës 17:30, në fshatin Vatë, ku një patrullë policore së bashku me një roje pylli kishin identifikuar një veturë të ngarkuar me dru, Opel Frontera. Shoferi i saj rreth 38-vjeçar, nuk iu bind sinjalizimeve për ndalim dhe u largua me shpejtësi.

Zyrtarët kanë arritur ta lokalizojnë veturën në afërsi të fshatit, ku edhe janë përballur me të dyshuarin. Sipas burimeve të Sinjalit, Dullovi i ka kërcënuar verbalisht dhe në mënyrë serioze zyrtarët policorë, duke i fyer dhe tentuar t’i frikësojë në vendin e ngjarjes.

Pas ndërhyrjes së njësisë së hetimeve rajonale dhe intervistimit të dëshmitarëve, si dhe zyrtarëve të përfshirë në rast, i dyshuari është shoqëruar në stacionin policor dhe është intervistuar në praninë e avokatit mbrojtës.

Me vendim të Prokurorit kujdestar, ndaj tij është caktuar masa e ndalimit prej 48 orësh, nën dyshimin për veprën penale “Kanosje ndaj personit zyrtar gjatë kryerjes së detyrës zyrtare”.

Hetimet po vazhdojnë.