Vjedhje e rëndë në Prishtinë

Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet. Shtëpitë, bizneset e ndryshme në Kosovë dhe hapësirat tjera publike janë shumë shpesh cak i hajnave, të cilët herë vetëm e herë në grup arrijnë të kryejnë vjedhje, raporton Gazeta Sinjali.

Një rast i tillë është raportuar në kryeqytet, ku persona të panjohur kanë vjedhur një motoçikletë të parkuar në afërsi të objektit të AKI-së.

Burimet e Sinjalit brenda hetuesisë bëjnë me dije se viktima V.G., rreth 48-vjeçar ka denoncuar se në periudhën kohore mes datave 02-04 korrik 2025, nga një depo përballë objektit të Agjencisë Kosovare të Inteligjencës në rrugën “Lidhja e Pejës”, i është vjedhur motoçikleta e tipit “Gilera-Piaggio”, ngjyrë e zezë, e prodhuar në vitin 2015 dhe pa targa, me vlerë rreth 2,000 euro.

Rasti është raportuar sot, më 04 korrik, ndërsa njësitë policore relevante kanë dalë në vendin e ngjarjes dhe kanë nisur hetimet.

Prokurorja kujdestare është njoftuar, ndërsa rasti është iniciuar si “Vjedhje e rëndë”, ndërkohë që autori mbetet i panjohur.