Gjendet 12 vjeçarja që u raportua e zhdukur

Nuk janë të rralla rastet kur qytetarët kërkojnë ndihmën e Policisë për t’i gjetur familjarët e tyre që raportohen të zhdukur. Shumë shpesh angazhohen edhe njësi e grupe vullnetare që të zbulojnë gjurmët e personave që nuk dihet asgjë për fatin e tyre, raporton Gazeta Sinjali.

Kështu pas katër ditësh kërkimi, është gjetur vajza 12-vjeçare L.H., e cila ishte raportuar si person i zhdukur më 30 qershor 2025, në rrugën “Sulejman Kollari” në Rahovec.

Burimet e Sinjalit bëjnë me dije se më 04 korrik 2025, rreth orës 23:50, nga Stacioni Policor në Prizren është njoftuar se vajza e mitur është hasur në qytet nga njësitë policore.

Patrulla nga SP Rahovec ka bërë shoqërimin e saj, fillimisht për ekzaminim mjekësor në QKMF Rahovec, më pas është intervistuar nga Policia, për shkak të mungesës së zyrtarëve të Qendrës për Punë Sociale.

Gjatë dëgjimit, vajza ka deklaruar se ishte larguar me vetiniciativë për të kërkuar lëmoshë në Prizren, ku kishte qëndruar ditët e fundit.

Pas procedurave të nevojshme, ajo është kthyer te familja e saj, respektivisht tek ankuesi – babai i saj, R.H., rreth 40-vjeçar.

Sinjali do të vazhdojë të përcjellë raste të tilla që prekin fëmijët dhe sigurinë e tyre në hapësirat publike.