Sulmohet policja, ajo gjuan me armë

Një incident i rëndë ka ndodhur pasditen e së premtes në Pikën Kufitare të Hanit të Elezit, ku një person i dyshuar është arratisur gjatë kontrollit policor, ka sulmuar një zyrtare policore dhe ka detyruar këtë të fundit të përdorë armën zyrtare duke shtënë në ajër.

Burimet e Sinjalit mësojnë se më 04 korrik 2025, rreth orës 16:50, gjatë procedurës së kontrollit në PKK Hani i Elezit, M. C., rreth 41-vjeçar është arratisur dhe është fshehur në restorantin “Shell” pranë zonës.

Policia e Hanit të Elezit, në bashkëpunim me njësitet e PKK-së, janë vënë në ndjekje të tij, por në momentin kur po përpiqeshin ta kapnin, i dyshuari ka sulmuar një zyrtare policore duke e goditur me dy duar në gjoks. Në përpjekje për vetëmbrojtje dhe për të parandaluar përshkallëzimin e situatës, zyrtarja ka përdorur armën zyrtare, duke shtënë një herë në ajër.

Pavarësisht këtij reagimi, i dyshuari ka arritur të ikë në drejtim të panjohur, duke sfiduar autoritetin policor dhe duke shkaktuar panik në zonën përreth.

Në vendngjarje kanë dalë njësia e hetimeve rajonale, IPK, si dhe patrullat e Hanit të Elezit, ndërsa rreth orës 19:00, të gjitha njësitë janë tërhequr nga terreni, thonë burimet e Sinjaljt.

Me urdhër të Prokurorit të Shtetit, rasti është inicuar si: “Sulm ndaj personit zyrtar”, “Arratisja e personit të privuar nga liria” dhe “Shkaktimi i rrezikut të përgjithshëm (përdorimi i armës zyrtare)”.

Dosja e plotë i është referuar Njësisë së Hetimeve Rajonale, ndërsa i dyshuari vazhdon të jetë në arrati.

Sinjali do të raportojë për çdo zhvillim të ri lidhur me këtë incident që prek seriozisht sigurinë e zyrtarëve policorë në detyrë.