Gruaja denoncon bashkëshortin dhe djalin, largohet nga shtëpia pas sulmit

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Një rast i tillë është raportuar të premten në fshatin Nepolë të Pejës, ku një grua ka përjetuar dhunë fizike dhe psikike nga bashkëshorti dhe djali i tij.

Burimet e Sinjalit bëjnë me dije se viktima R.K., rreth 37-vjeçare ka deklaruar në Polici se është sulmuar fillimisht psikikisht nga bashkëshorti H.K., rreth 44-vjeçar , ndërsa më pas ka qenë djali i tij, E.K. (2003), ai që ka ushtruar dhunë fizike ndaj saj.

Sipas saj, konflikti ka nisur kur i kishte kërkuar bashkëshortit që të blinte bukë. Ai kishte reaguar me të bërtitura dhe duke thyer gjësende në shenjë revolte. Pak më vonë kishte ardhur djali i tij, i cili fillimisht ishte përpjekur ta qetësonte situatën, por më pas e kishte shtrënguar në krahë dhe shtyrë me forcë për ta nxjerrë nga shtëpia.

Pas ngjarjes, viktima është larguar nga shtëpia dhe është strehuar tek prindërit e saj në fshatin G. të Deçanit. Policia ka dalë në vendin e ngjarjes, ku viktima është intervistuar në prezencën e hetuesit të dhunës në familje, ndërsa të dyshuarit janë ftuar dhe janë paraqitur rreth orës 21:20 në Stacionin Policor në Pejë, ku janë marrë në pyetje.

Me urdhër të prokurorit kujdestar, rasti është iniciuar si “Dhunë në familje”, ndërsa të dyshuarit janë liruar në procedurë të rregullt.