Seanca konstituive do të vazhdojë sonte në orën 20:00

Një alarm për vendosjen e një bombe në Kuvendin e Kosovës ka shkaktuar ndërprerjen e aktivitetit parlamentar dhe ka aktivizuar të gjitha njësitë e sigurisë në terren.

Ngjarja ndodhi pak para nisjes së seancës së 42-të konstituive, duke sjellë evakuimin e plotë të ndërtesës nga Policia e Kosovës.

Mesazhi kërcënues ka qenë në gjuhën angleze dhe ka arritur përmes emailit në adresën zyrtare të një punonjëse në zyrën e Kryetarit të Kuvendit, Glauk Konjufca.

Sipas autoriteteve, personi që ka bërë kërcënimin ka pretenduar se në ndërtesë ishte vendosur një bombë që do të shpërthente brenda 10 minutash, duke kërkuar evakuimin e menjëhershëm të stafit dhe deputetëve.

Informacionin e ka konfirmuar edhe zëvendësi i Sekretarit të Përgjithshëm të Kuvendit, Arben Loshi, i cili ka theksuar se kërcënimi është bërë përmes një telefonate në gjuhën angleze. Ai shtoi se të gjitha masat e nevojshme janë ndërmarrë për të garantuar sigurinë në objekt.

Seanca konstituive, e cila u pezullua për shkak të këtij incidenti, pritet të vazhdojë në orën 20:00.