E ngacmoi seksualisht ish-partnerën dhe tentoi të futej në tualetin ku ndodhej ajo

Një rast i rëndë i dhunës në familje është raportuar të shtunën në Pejë, ku një burrë dyshohet se ka tentuar të futet në tualetin e një lokali ku punonte ish-partnerja e tij, me qëllim të kryerjes së marrëdhënieve seksuale pa pëlqimin e saj, raporton Gazeta Sinjali.

Sinjali mëson se ngjarja ka ndodhur më 5 korrik, rreth orës 17:30 në rrugën “Naum Veqilharxhi”, kur viktima F.O. 47 vjeçare ka njoftuar Policinë për ngacmimin që i kishte bërë B.R., 52 vjeçar, me të cilin kishte bashkëjetuar më parë.

Sipas deklaratës së saj, i dyshuari i kishte bërë komente të padëshiruara me përmbajtje seksuale dhe kishte tentuar të futej në tualetin e lokalit, dera e të cilit nuk mbyllej me çelës, në kohën kur ajo ndodhej brenda.

Policia ka intervenuar menjëherë, ku të dy janë shoqëruar në Stacionin Policor në Pejë dhe janë intervistuar nga njësia për dhunë në familje.

Me urdhër të Prokurorit të Shtetit, rasti është iniciuar si “Dhunë në familje”, ndërsa i dyshuari B.R. është liruar në procedurë të rregullt.

Hetimet po vazhdojnë.