Dhunë në familje në Prishtinë – gruaja largohet nga banesa me vajzën e mitur dhe kërkon strehim

Mësohet se një rast i dhunës psikologjike në familje është raportuar më 6 korrik në Stacionin Policor Jugu në Prishtinë.

Burimet e Sinjalit bëjnë të ditur se viktima, E.T., ka deklaruar se është e martuar me të dyshuarin R.I. prej 18 vitesh dhe kanë një vajzë të përbashkët 12-vjeçare. Ajo ka treguar se prej rreth një muaji është duke përjetuar dhunë të vazhdueshme psikologjike, përmes fyerjeve dhe ofendimeve nga bashkëshorti.

Sipas saj, një ditë më parë i dyshuari ia kishte marrë telefonin dhe nuk ia kishte kthyer. Për këtë arsye, në orët e hershme të mëngjesit, ajo është larguar nga banesa së bashku me vajzën e saj dhe është strehuar në një strehimore, duke theksuar se nuk dëshiron të kthehet më dhe do të vazhdojë me procedura ligjore pas konsultimit me avokatin.

Lidhur me rastin është njoftuar prokurorja kujdestare, e cila ka udhëzuar që të iniciohet rasti si “Dhuna në familje”, ndërsa i dyshuari është liruar në procedurë të rregullt.