Ngjarje e rëndë në Itali

Një ngjarje e rëndë ka ndodhur mbrëmjen e së shtunës në qytetin Rovigo të Italisë, pranë një kioske në zonën “San Bortolo”, ku një shqiptar 36-vjeçar është goditur disa herë me thikë dhe ndodhet në spital pas një ndërhyrjeje kirurgjikale.

Fillimisht u mendua se bëhej fjalë për një sulm të njëanshëm, ku agresori ishte një rumun 24-vjeçar, i njohur më herët për policinë, por hetimet kanë zbuluar një situatë shumë më të ndërlikuar.

Sipas prokurorisë italiane, janë tre persona nën hetim, të gjithë për plagosje. Nga njëra anë rumuni 24-vjeçar, i dyshuar se plagosi rëndë shqiptarin dhe gruan e tij, ndërsa nga ana tjetër vetë shqiptari i plagosur dhe një kushëri i tij 23 vjeç, të dy nën hetim për plagosjen e të riut rumun. Pra, përplasja nuk ishte aq e njëanshme sa u mendua në fillim.

Nga shtrati i spitalit, shqiptari 36-vjeçar ka thyer heshtjen duke dhënë versionin e tij për gazetën “La Voce di Rovigo”. Ai pretendon se konflikti nisi për shkak të mosmarrëveshjeve të mëhershme mes rumunit dhe nipit të tij 23-vjeçar. Sipas tij, të premten në mbrëmje, pasi ishte takuar për të sqaruar çështjen, rumuni e kishte goditur me thikë 7 herë nga pas, kishte plagosur edhe gruan e tij dhe rrahur djalin 13-vjeçar me probleme të zhvillimit.

Por avokati i të riut rumun ka mohuar çdo akuzë, duke thënë se klienti i tij është sulmuar në banesën e tij nga disa persona të armatosur dhe se është mbrojtur për të shpëtuar jetën. Sipas tij, i riu është viktimë dhe duhet mbrojtur, duke i bërë thirrje institucioneve të marrin masa për rininë që po jeton mes dhunës dhe frikës.

Ndërkohë, autoritetet po vazhdojnë hetimet, ku pritet të analizohen rrobat e gjakosura të shqiptarit dhe thika e sekuestruar, me gjatësi totale 38 cm.

Kjo ngjarje vjen në një moment shqetësues për qytetin italian, pasi vetëm brenda një jave janë regjistruar tre raste të therjes me thikë në qendër të Rovigos, dy prej të cilave me pasoja të rënda. Për këtë arsye, kryebashkiakja Valeria Cittadin ka kërkuar një mbledhje urgjente të Komitetit për Rendin dhe Sigurinë Publike, që pritet të zhvillohet në mesin e këtij muaji./JoqAlbania