Carlo Ancelotti dënohet me 1 vit burg për evazion fiskal në Spanjë

Trajneri i ri i kombëtares së Brazilit, Carlo Ancelotti, është dënuar nga një gjykatë spanjolle me 1 vit burg dhe një gjobë prej afro 400 mijë eurosh për fshehje të të ardhurave, por nuk do ta vuajë dënimin në burg.

Gjykata e dënoi teknikun 66-vjeçar pasi ai nuk kishte deklaruar rreth 1 milion euro nga paga që ka përfituar gjatë periudhës së tij të parë si trajner i Real Madrid, nga viti 2013 deri më 2015.

Sipas ligjeve spanjolle, dënimet më pak se dy vjet për vepra jo të dhunshme nuk dënohen me burg për personat që nuk kanë precedentë penalë. Në vend të burgut, Ancelotti do të duhet të paguajë një gjobë prej 386 mijë eurosh euro.

Gjatë dëshmisë në gjyq, Ancelotti tha se nuk kishte menduar kurrë të mashtronte dhe se kishte lënë menaxhimin e pagës së tij në duart e këshilltarëve financiarë.

“Mendova se ishte diçka normale, sepse të gjithë lojtarët dhe trajneri para meje kishin bërë të njëjtën gjë,” – tha ai.

Ai shlyeu borxhin e plotë në dhjetor 2021.

Ancelotti i bashkohet një liste të gjatë emrash të njohur të futbollit që janë përballur me drejtësinë spanjolle për fshehje të të ardhurave.

*Lionel Messi (2017) – fillimisht u dënua me 21 muaj burg, më pas u kthye në gjobë prej 252,000 eurosh.

Cristiano Ronaldo (2019), mori një gjobë prej 18.8 milionë eurosh.

Jose Mourinho, u gjobit me 2.2 milionë euro për evazion gjatë kohës që ishte trajner i Real Madrid.

Ancelotti, që përfundoi periudhën e tij të dytë te Real Madrid në fund të sezonit të kaluar, tani është zyrtarisht në krye të Brazilit, një nga kombëtaret më të lavdishme në historinë e futbollit.