Policia ndalon 5 automjete me dru, sekuestron ato

Në kuadër të zbatimit të planit operativ “Mbrojtja e Pyjeve 2025”, Policia e Ferizajt ka ndërmarrë një aksion në terren, ku ka ndaluar pesë automjete që transportonin dru pa dokumentacion përkatës.

Sipas njoftimit zyrtar, njësitet policore të stacionit në Ferizaj, me datë 11 korrik 2025, kanë ndaluar një kamionetë dhe katër furgona, të gjitha me targa vendore, që po bartnin lëndë drusore në mënyrë të kundërligjshme.

Automjetet janë kontrolluar dhe është konstatuar se drejtuesit nuk posedonin dokumentacionin e nevojshëm për transportin e materialit drusor.

Si rezultat, automjetet dhe lënda drusore janë sekuestruar nga zyrtarët e pylltarisë për procedura të mëtejme ligjore.

Policia Rajonale e Ferizajt thekson se do të vazhdojë me përkushtim zbatimin e këtij plani dhe luftimin e prerjes e tregtimit të paligjshëm të drunjve.

Po ashtu, fton qytetarët të bashkëpunojnë përmes linjave emergjente 192 ose 0290/326-250, si dhe përmes aplikacionit “Lajmëro Policinë”, duke garantuar konfidencialitet të plotë për çdo informacion të raportuar.