Zbulohet futbollisti që Flick dëshiron te Barça

FC Barcelona vazhdon me intensitet planet për ndërtimin e skuadrës për të ardhmen, dhe pas refuzimit të Nico Ëilliams si dhe vështirësive ekonomike për të siguruar shërbimet e Luis Díaz, katalanasit kanë kthyer vëmendjen te një tjetër emër i madh: Marcus Rashford.

Sipas gazetarit të njohur Florian Plettenberg, trajneri aktual i Barçës, Hansi Flick, ka dhënë dritën jeshile për afrimin e Rashford, duke e konsideruar sulmuesin anglez si të përkryer për stilin e tij të lojës. Kjo mbështetje personale nga Flick e ka vendosur yllin e Manchester United në krye të listës së prioriteteve për repartin ofensiv.

Rashford, 27 vjeç, po kalon një moment kritik në karrierën e tij pas një sezoni të paqëndrueshëm në “Old Trafford”, dhe spekulimet për një largim të mundshëm janë shtuar. Barcelona beson se një huazim me të drejtë blerjeje do të ishte formula më e përshtatshme për të sjellë sulmuesin në “Camp Nou”.

Rrethina e Rashford ka shfaqur tashmë interes për një ndryshim ambienti, dhe disa javë më parë vëllai i tij, i cili është njëkohësisht përfaqësuesi i lojtarit, është parë në Barcelonë, ku raportohet se ka pasur bisedime me Drejtori Sportiv, Deco.

Ndryshe nga situata me Luis Díaz, që vazhdon të mbetet një operacion i vështirë për shkak të çmimit të lartë dhe kufizimeve të Liverpool-it, pista Rashford shihet si më realiste dhe e përballueshme. Vetë lojtari është i motivuar për të ringjallur karrierën, dhe ideja e transferimit te Barcelona është joshëse për të.

Ndërkohë, edhe Bayern Munich po konsideron një lëvizje për Rashfordin, por optimizmi është i lartë në radhët e Barçës. Interesimi i klubit dhe mbështetja e trajnerit Flick e bëjnë Rashford prioritetin kryesor për të përforcuar sulmin gjatë këtij afati kalimtar.