Ish-bashkëshortja tenton të hyjë me forcë në banesën e burrit

Numri i rasteve të dhunës në familje ka marrë përmasa shqetësuese në vendin tonë. Çdo ditë raportohen raste të ndryshme, ku përfshihen burra e gra, prindërit e fëmijët. Kështu ndodhi së fundmi në një familje në kryeqytet.

Sinjali mëson se një ngjarje e tensionuar është regjistruar pasditen e së premtes në rrugën “Perandori Justinian” në Prishtinë, ku një burrë ka kërkuar ndihmën e Policisë pas një incidenti me ish-bashkëshorten e tij.

Burimet e Gazetës Sinjali bëjnë me dije se rreth orës 19:00, qytetari F.Xh., rreth 52-vjeçar ka raportuar në polici se ish-bashkëshortja e tij, F.Xh., rreth 46-vjeçare, kishte ardhur në banesën e tij dhe kishte shkelmuar derën, duke tentuar të hyjë me forcë brenda.

Sipas dëshmisë së viktimës, ai ka refuzuar ta hapë derën për shkak të frikës dhe shqetësimit dhe menjëherë ka kërkuar ndihmën e autoriteteve.

Në vendin e ngjarjes kanë intervenuar njësitë policore, të cilët i kanë shoqëruar palët në Stacionin Policor, ku janë intervistuar për rrethanat e rastit. Po ashtu, është marrë edhe deklarata e dëshmitarit.

Me urdhër të Prokurorit Kujdestar, ndaj të dyshuarës është iniciuar rasti “Dhunë në familje”, ndërsa e njëjta është liruar në procedurë të rregullt.

Rasti mbetet në hetim nga njësitë përkatëse. Sinjali do të përcjellë çdo zhvillim të ri.