Osmani e thotë sërish: Trumpi e ka parandaluar eskalimin e Serbisë në kufirin me Kosovën

Presidentja e Kosovës, Vjosa Osmani, ka rikujtuar rolin e presidentit amerikan, Donald Trump, në parandalimin e një përshkallëzimi të mundshëm të situatës në kufirin ndërmjet Kosovës dhe Serbisë.

Gjatë një diskutimi në Hudson Institute në SHBA, Osmani deklaroi sërishe ishte vetë Trump ai që u përfshi personalisht për të ndalur tensionet në atë kohë, duke treguar angazhimin e tij për paqen në rajon.

“Siç e ka thënë Presidenti Trump, ai e ka parandaluar një tension, e ka parandaluar një eskalim, atë që Serbia po përpiqej ta bënte në kufirin me Kosovën. Por, ishte angazhimi i tij personal dhe roli i tij që e parandaloi, që është një lidership i vërtetë në ruajtjen e paqes”, ka thënë Osmani.

Në të njëjtin diskutim, ajo theksoi rëndësinë jetike të rolit të Shteteve të Bashkuara në ruajtjen e paqes globale, duke përmendur shembullin e luftës në Ukrainë si një dëshmi për nevojën e një angazhimi të vazhdueshëm ndërkombëtar.

“Sepse paqja, siç e dimë të gjithë nga lufta në Ukrainë, nuk duhet të merret kurrë si e mirëqenë. Është diçka që duhet mbrojtur vazhdimisht, duhet kultivuar vazhdimisht. Dhe roli i Shteteve të Bashkuara në këtë përpjekje është thelbësor. Është i domosdoshëm dhe i pazëvendësueshëm”, është shprehur Osmani.