Gjobitet shoferi që voziti 84 km/h në zonën 40 km/h

Njësia e Komunikacionit Rrugor në Ferizaj ka ndaluar një shofer për kundërvajtje të rënda në trafik, pasi u kap duke vozitur me shpejtësi të lartë në zonë të kufizuar.

Sipas njoftimit të Policisë Rajonale të Ferizajt, më 11 korrik 2025, rreth orës 15:37, në rrugën “Brahim Ademi”, është ndaluar një veturë e tipit Daimler Benz me targa vendore, e cila drejtohej nga personi me inicialet B.B., 32 vjeç.

Gjatë matjes me radar laserik, shoferi është kapur duke vozitur me 84 km/h, në një zonë ku kufizimi i lejuar i shpejtësisë është 40 km/h.

Për këtë shkelje, ndaj shoferit janë shqiptuar këto masa:

• Gjobë në vlerë prej 200 euro

• 2 pikë negative në patentë shofer

• Ndalim i drejtimit të automjetit për 3 muaj

Policia ka paralajmëruar se do të vazhdojë me kontrolle të rregullta dhe aksione të shtuara në rrugët e qytetit për të garantuar siguri më të lartë në trafik.

Qytetarët ftohen që të bashkëpunojnë me Policinë duke raportuar çdo shkelje apo rrezik në trafikun rrugor përmes:

192
0290/326-250
0290/322-406
Aplikacionit “Lajmëro Policinë”

Të gjitha informacionet do të trajtohen me konfidencialitet të plotë, njofton Policia Rajonale e Ferizajt.