Lirohet pas intervistimit, por kthehet në shtëpi dhe e kanos sërish babain

Një rast i rëndë i dhunës në familje është përshkallëzuar në Pejë, ku një i ri, pas intervistimit në Polici dhe lirimit të tij, është kthyer në shtëpi dhe ka ushtruar sërish dhunë verbale ndaj babait, raporton Gazeta Sinjali.

Burimet e Gazetës Sinjali brenda hetuesisë bëjnë me dije se më 12 korrik 2025, në rrugën Beqir Kastrati në Pejë, ishte iniciuar rasti i parë ku M.V., rreth 19-vjeçar ishte intervistuar në stacionin policor si i dyshuar për dhunë ndaj babait të tij, G.V., rreth 49-vjeçar.

Fillimisht, me udhëzim të Prokurorit të Shtetit, i dyshuari ishte liruar në procedurë të rregullt, por situata ka marrë tjetër kahje vetëm pak orë më vonë.

Sipas burimeve të Sinjalit, pas kthimit në shtëpi, i riu ka rifilluar dhunën verbale dhe ka kanosur verbalisht babain e tij, duke nxitur ndërhyrjen e Policisë për herë të dytë.

Kësaj here, i dyshuari është arrestuar në vendin e ngjarjes, ndërsa pas konsultimit me Prokurorin kujdestar, ndaj tij është caktuar masa e ndalimit për 48 orë, për veprën penale “Dhunë në Familje”.