Dy të vdekur dhe disa të plagosur nga të shtënat masive në SHBA

Dy gra humbën jetën dhe katër persona të tjerë, mes tyre një oficer, u plagosën gjatë një sulmi të armatosur në një kishë në qytetin Lexington.

Një ngjarje e rëndë me dy të vrarë dhe disa të plagosur ka tronditur Kentuckyn të dielën, pas një serie të shtënash me armë që ndodhën në zona të ndryshme të qytetit Lexington. Autori, identiteti i të cilit nuk është bërë ende publik, fillimisht hapi zjarr ndaj një oficeri të Policisë së Shtetit të Kentuckyt dhe më pas u përfshi në një tjetër incident në ambientet e një kishe lokale.

Sipas shefit të Policisë së Lexingtonit, Lawrence Weathers, ngjarja nisi në orën 11:36 paradite, kur patrulla ndaloi automjetin e autorit pas një sinjali të sistemit të njohjes së targave. Gjatë ndalimit, autori qëlloi drejt efektivit dhe u largua nga vendngjarja. Oficeri ndodhet jashtë rrezikut për jetën dhe po trajtohet në spital.

Pas ndjekjes, autori u lokalizua pranë kishës Richmond Road Baptist, ku sipas policisë, kishte një lidhje me disa nga personat që ndodheshin aty. Në ambientet e kishës, ai qëlloi mbi katër persona, dy prej të cilëve – gra – humbën jetën menjëherë në vendngjarje. Dy meshkuj të tjerë mbetën të plagosur; njëri në gjendje kritike, tjetri në gjendje të qëndrueshme.

Autori i dyshuar u përball me forcat e rendit në vendin e dytë të ngjarjes dhe u qëllua nga policia. Ai u shpall i vdekur në vend. Informacioni mbi identitetin e tij pritet të bëhet publik pasi të njoftohen familjarët.

Ngjarja përfshiu gjithashtu një incident pranë aeroportit Blue Grass, rreth 25 kilometra nga vendi i dytë i ngjarjes. Forcat zjarrfikëse konfirmuan se kanë transportuar një person me plagë serioze në spital, ndërsa autoritetet sqaruan se ndonëse të shtënat ndodhën në rrugën hyrëse të terminalit, nuk kishin lidhje direkte me aeroportin.

Guvernatori i Kentuckyt, Andy Beshear, u bëri thirrje qytetarëve të luten për viktimat dhe falënderoi reagimin e shpejtë të forcave të rendit. Ndërkohë, edhe Prokurori i Përgjithshëm i shtetit, Russell Coleman, shprehu mirënjohje për punën e efektivëve, duke e cilësuar këtë si një tjetër dëshmi të rrezikut që përballin çdo ditë.

Autoritetet kanë bërë të ditur se hetimet vijojnë dhe informacionet do të përditësohen ndërsa faktohen detaje të reja të kësaj ngjarjeje tragjike.