Ekskluzive: Hajnat godasin në Lagjen e Doktorëve në Mitrovicë

Një vjedhje e rëndë është raportuar mbrëmjen e së dielës në Lagjen e Doktorëve në Mitrovicën e Veriut, ku persona të panjohur kanë hyrë me forcë në një shtëpi dhe kanë marrë një shumë të konsiderueshme parash dhe stoli ari, raporton Gazeta Sinjali.

Sipas informacioneve që ka siguruar Sinjali nga burime brenda hetuesisë, ngjarja ka ndodhur më 13 korrik 2025, në intervalin kohor mes 18:00 dhe 23:00.

Viktima e këtij rasti është F.T. rreth 49-vjeçar i cili rreth orës 23:30 ka njoftuar Policinë se shtëpia e tij ishte bërë lëmsh nga hajnat. Persona të panjohur dyshohet se kanë hyrë përmes dritares, duke vjedhur: Para të gatshme në vlerë prej 4.550 euro, Stoli ari në vlerë prej 3.560 euro, Tri çanta krahu në vlerë rreth 50 euro.

Në vendin e ngjarjes kanë dalë patrulla policore, hetuesit dhe krimteknikët, të cilët kanë kryer ekzaminimet e para. Prokurori kujdestar është kontaktuar dhe ka autorizuar inicimin e rastit si “Vjedhje e rëndë”.

Aktualisht nuk ka persona të dyshuar, ndërsa hetimet po vazhdojnë nga njësia e hetimeve në Mitrovicë.