Dhunë në familje – Vajza e rreh njerkën pas një përplasjeje

Një rast dhune në familje është raportuar pasditen e së dielës në qytetin e Gjakovës, ku një grua ka kërkuar ndihmë nga Policia pasi dyshohet se është sulmuar nga vajza e bashkëshortit të saj, raporton Gazeta Sinjali.

Burime të sigurta të Sinjalit bëjnë me dije se rasti ka ndodhur rreth orës 17:00, në rrugën “Isuf Ahmeti”. Viktima e këtij rasti është V. Q. rreth 62-vjeçare, e cila ka deklaruar para hetuesve se pas një mosmarrëveshjeje familjare, është ofenduar, kërcënuar dhe sulmuar fizikisht nga e dyshuara F.B., rreth 28-vjeçare, vajza e burrit të saj.

Sipas deklaratës, e dyshuara e ka goditur viktimën në kokë, fytyrë dhe dorë, ku kjo e fundit ka pësuar gërvishtje në dorën e djathtë. Viktima ka marrë ndihmë mjekësore, ndërsa ka refuzuar të strehohet në qendër të mbrojtjes emergjente.

Me dëshirën e saj, ajo është larguar përkohësisht tek motra, por ka kërkuar urdhër mbrojtje, duke theksuar se ndjehet e rrezikuar nga e dyshuara.

E dyshuara është arrestuar dhe është intervistuar në prani të avokatit, ku pas konsultimit me Prokurorin kujdestar, është marrë vendimi që e dyshuara të lirohet në procedurë të rregullt, ndërsa rasti mbetet nën hetim.

Sinjali do të vazhdojë të raportojë për këtë rast dhe për çdo zhvillim të ri në lidhje me sigurinë e viktimës dhe vendimin mbi urdhrin e mbrojtjes.