Sulmojnë dhe pengojnë policët gjatë shqiptimit të gjobës për parkim

Një incident i rëndë ka ndodhur mbrëmë në qytetin e Pejës, ku disa persona kanë sulmuar fizikisht dhe kanë penguar zyrtarët policorë në kryerjen e detyrës zyrtare, raporton Gazeta Sinjali.

Sipas informacioneve ekskluzive të Sinjalit, rasti ka ndodhur më 13 korrik 2025, rreth orës 19:50, në rrugën “Nëna Terezë”, ku patrulla policore ishte duke ndërmarrë masa për gjobitjen e automjeteve të parkuara në mënyrë të parregullt mbi trotuar.

Në momentin kur njëri nga të dyshuarit, Jusuf Kelmendi rreth 25-vjeçar, ka marrë gjobën, ai ka filluar t’i sulmojë verbalisht policët. Situata është tensionuar edhe më shumë me ardhjen e dy të dyshuarve tjerë: Olti Gjeladini rreth 20-vjeçar dhe Tomor Xheladini rreth 49-vjeçar, të cilët kanë ndërhyrë për ta penguar arrestimin.

Sipas burimeve, Olti Gjeladini ka shtyrë dhe rrëzuar në tokë një zyrtar policor, duke i shkaktuar dëmtime trupore dhe dëmtim të uniformës zyrtare. Gjatë përpjekjes për arrestim, edhe Tomor Xheladini është përfshirë në përleshje, duke tentuar të pengojë veprimet e policisë.

Dy të dyshuarit kanë shfaqur rezistencë aktive, duke detyruar njërin nga zyrtarët policorë të përdorë spray OC (sprej irritues) për të vendosur situatën nën kontroll.

Si pasojë e incidentit e dy zyrtarë policorë kanë pësuar lëndime të dukshme në trup dhe qafë, ndërsa Olti Gjeladini ka përfunduar në trajtim mjekësor për shkak të skuqjes në fytyrë dhe sy, si efekt i sprejit.

Në vendin e ngjarjes kanë dalë njësia e hetimeve dhe krimteknika, ndërsa është njoftuar edhe Sektori i Hetimeve Rajonale dhe prokurori kujdestar.

Me urdhër të Prokurorit, Olti Gjeladini dhe Tomor Xheladini janë ndaluar për 48 orë nën dyshimin për veprën penale “Sulm ndaj personit zyrtar”. Ndërsa Jusuf Kelmendi është intervistuar dhe është liruar në procedurë të rregullt, për veprën “Pengim i personit zyrtar në kryerjen e detyrave zyrtare”.

Sinjali do të raportojë për çdo zhvillim të ri në lidhje me këtë rast.