Arrestohet një person

Gazeta Sinjali raportoi ditë më parë për një rast të rëndë të tentim vrasjes që ndodhi më 12 korrik në fshatin Gojbulë të Vushtrrisë, ku një 40-vjeçar mbeti i plagosur rëndë nga armë zjarri, ndërsa autori i dyshuar ishte në arrati.

Viktima, F.V., u qëllua me armë të gjatë teksa ndodhej në një kontenier në pronën që po ruante në rrugën “Shala e Bajgorës”. Ai u dërgua me urgjencë në QKUK në Prishtinë për shkak të lëndimeve të rënda trupore.

Lidhur me këtë rast, Policia e Kosovës ka njoftuar se në Mitrovicën e Jugut është arrestuar një person i dyshuar për veprën penale “Vrasje në tentativë”.

“I dyshuari F.A., 40-vjeçar, dyshohet se me datën 12 korrik 2025, është përfshirë në një rast të ndodhur në fshatin Gojbuljë të Vushtrrisë, ku si pasojë e të shtënave me armë zjarri ishte plagosur viktima mashkull/kosovar/shqiptar, i cili ishte duke ruajtur një pronë private. Viktima është dërguar për trajtim në QKUK, Prishtinë.”, thuhet në njoftim.

Nga vendi i ngjarjes janë sekuestruar dy gëzhoja si prova materiale.

Hetimet kanë zbuluar se në këtë rast dyshohet se janë të përfshirë edhe dy persona të tjerë, të cilët vazhdojnë të jenë në kërkim nga Policia.

Ndaj të dyshuarit të arrestuar, pas intervistimit, është caktuar masa e ndalimit policor me vendim të prokurorit kompetent.