Këta janë të dyshuarit për tentimvrasjen
Gazeta Sinjali ka siguruar detaje ekskluzive lidhur me një rast të rëndë kriminal që ka ndodhur më 12 korrik 2025, në rrugën “Shala e Bajgorës” në fshatin Gojbulë të Vushtrrisë, ku një person mbeti i plagosur me armë zjarri.
Sipas burimeve të sigurta të Sinjalit, viktima është Fatmir Voca, i cili është qëlluar me armë zjarri derisa po ruante një pronë private brenda një kontenieri për qëndrim të përkohshëm. I plagosur, ai ka kërkuar ndihmë në Emergjencën e Spitalit të Vushtrrisë dhe më pas është transferuar në QKUK – Prishtinë, ku ndodhet ende nën përkujdesje mjekësore dhe mbikëqyrje policore.
Hetimet fillestare të Policisë kanë zbuluar njolla gjaku, copëza xhami të thyer dhe dy gëzhoja të armës së gjatë, të cilat janë sekuestruar në vendin e ngjarjes nga Forenzika. Fillimisht nuk kishte asnjë të arrestuar, ndërsa motivi mbeti i paqartë.
Pas një pune hetimore të intensifikuar nga Sektori Rajonal i Hetimeve në Mitrovicë, janë identifikuar tre persona të dyshuar si të përfshirë në këtë tentimvrasje: Festim Ademi, rreth 40-vjeçar, Lirigzon Ademi, rreth 33-vjeçar dhe Fitim Ademi, rreth 40-vjeçar.
Pas lëshimit të urdhër-bastisjeve nga Prokuroria, janë kontrolluar disa lokacione në fshatin Gojbulë, por dy nga të dyshuarit nuk janë gjetur, ndërsa nuk janë sekuestruar armë apo prova të drejtpërdrejta.
Më 14 korrik 2025, rreth orës 22:45, është arrestuar i dyshuari i tretë, i cili është ndaluar për 48 orë me urdhër të Prokurorit të Shtetit dhe është intervistuar në prani të avokatit mbrojtës. Ai pritet të dalë para Gjykatës Themelore në Mitrovicë për procedurat e mëtejshme.
Ndërkohë, dy të dyshuarit e tjerë janë në arrati, dhe janë shpallur në kërkim nga Policia e Kosovës. Hetimet janë duke vazhduar me intensitet për të lokalizuar personat e shpallur në kërkim dhe për të dokumentuar tërësisht rrethanat e kësaj ngjarjeje të rëndë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
