15 vjeçari sulmohet në shkollë me shkop bejsbolli nga bashkëmoshatari

Përleshjet mes nxënësve në shkollat fillore e të mesme në vendin tonë janë shumë të shpeshta. Plot incidente të tilla ndodhin brenda hapësirave të shkollave apo edhe në afërsi të tyre dhe eskalojnë edhe në rrahje brutale, siç ndodhi gjatë ditës së djeshme në, raporton Gazeta Sinjali.

Së fundmi, një rast i tillë mes të miturve është raportuar në Shkollën Fillore “Afrim Gashi” në Hajvali të Prishtinës, ku një nxënës ka sulmuar një bashkëmoshatar me shkop bejsbolli, duke i shkaktuar lëndime të rënda trupore.

Rasti ka ndodhur më 27 qershor 2025, rreth orës 13:10, në oborrin e shkollës, ku viktima, një i mitur, rreth 15-vjeçar, ka përfunduar me lëndime të rënda pas goditjeve që kishte marrë nga një tjetër i mitur, po ashtu i lindur në vitin 2010.

Pas incidentit, i dyshuari ishte në arrati për rreth 20 ditë, derisa më 16 korrik 2025, rreth orës 22:40, është paraqitur në Stacionin Policor së bashku me prindin e tij.

I mituri është intervistuar nga hetuesit në prani të përfaqësuesve ligjorë dhe të prindit, ndërsa me vendim të Prokurorit të Shtetit, është ndaluar për 24 orë dhe është dërguar në Qendrën e Ndalimit.

Rasti është iniciuar si “Lëndim i rëndë trupor”, ndërsa hetimet janë në zhvillim nga njësia përkatëse e hetimeve në Prishtinë.