Aksident – Katër të lënduar pasi vetura humb kontrollin dhe godet tri mjete të parkuara

Një aksident trafiku me pasoja në njerëz është raportuar pas mesnate në rrugën nacionale që lidh Leposaviqin me Leshakun, saktësisht në fshatin Kajkovë.

Gazeta Sinjali mëson se rasti ka ndodhur më 17 korrik 2025, rreth orës 00:20, ku janë përfshirë katër mjete – tre vetura dhe një traktor – ndërsa katër persona kanë pësuar lëndime trupore.

Sipas hetimeve preliminare, drejtuesi i veturës VW Golf me targa KG-284-HN, D.S., rreth 18-vjeçar, dyshohet se ka humbur kontrollin mbi mjetin duke mos i përshtatur shpejtësinë kushteve të rrugës dhe ka devijuar nga drejtimi, duke dalë nga rruga në anën e djathtë.

Vetura ka goditur fillimisht një Renault të parkuar jashtë rruge (targa BG-1076-IY), më pas një traktor IMT 539 (targa 1521-SO – Topola), të cilin e ka rrokullisur, dhe në fund një Passat me targa 02-720-GH, gjithashtu i parkuar jashtë rruge.

Përveç dëmeve të konsiderueshme materiale, lëndime trupore kanë pësuar katër persona: U.A., rreth 20-vjeçar, A.B., rreth 19-vjeçar, L.R., rreth 18-vjeçar dhe B.R., rreth 30-vjeçar.

Të lënduarit janë transportuar me autoambulancë në Qendrën Spitalore të Mitrovicës së Veriut për trajtim mjekësor.

Rasti është iniciuar si “Aksident trafiku me lëndime trupore” dhe ndodhet nën hetim nga njësitë përkatëse të Policisë.