Demolohet objekti i ambulancës

Një objekt i shëndetësisë publike në komunën e Gjakovës është bërë cak i një akti vandalizmi, ku persona të panjohur kanë shkaktuar dëme materiale duke demoluar hapësirat e tij.

Burime të Gazetës Sinjali bëjnë me dije se mëngjesin e sotëm, më 18 korrik 2025, rreth orës 09:15, është raportuar se ambulanca e Mjekësisë Familjare në fshatin Molliq është dëmtuar nga persona të paidentifikuar.

Rastin e ka raportuar J.B., rreth 45-vjeçar, i cili ka deklaruar se objekti ka qenë jashtë funksionit prej kohësh, ndërsa në mëngjes është vërejtur se janë thyer xhamat dhe dy dyer hyrëse të ndërtesës.

Në vendngjarje kanë dalë njësia e hetimeve nga Policia e Gjakovës, të cilët kanë konstatuar gjendjen dhe kanë nisur procedurat hetimore.

Sipas ankuesit, nuk rezulton të jetë vjedhur ndonjë send, përveç dëmeve të dukshme materiale në hyrje të objektit.

Lidhur me rastin është kontaktuar Prokurori i Shtetit, i cili ka urdhëruar që të iniciohet rasti si “Asgjësim apo dëmtim i pasurisë”, ndërsa hetimet janë në zhvillim.