Arrestohet 36-vjeçari që sulmoi të dashurën

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët ose të partnerët e tyre, raporton Gazeta Sinjali.

Një rast i tillë është raportuar të premten pasdite në fshatin Bec të Gjakovës.

Sipas burimeve të Sinjalit, viktima D.B., rreth 27-vjeçare, ka raportuar në Polici se është sulmuar fizikisht nga i dashuri i saj, A. A., rreth 36-vjeçar, me të cilin kishte një lidhje jashtëmartesore.

Ajo ka deklaruar se i dyshuari e kishte goditur dhe ushtruar dhunë fizike ndaj saj. Viktima ka refuzuar ndihmën mjekësore dhe strehimin në qendrën për mbrojtjen e viktimave, duke zgjedhur të strehohet përkohësisht te prindërit e saj.

Burimet thonë se pas denoncimit, Policia ka ndërhyrë, ka arrestuar të dyshuarin dhe e ka shoqëruar për në stacionin policor, ku është intervistuar në prani të mbrojtësit të tij.

Me urdhër të prokurorit të shtetit, ndaj të dyshuarit është caktuar masa e ndalimit për 48 orë, ndërsa rasti është nën hetime për veprën penale “Dhunë në familje”.