Shqetësuese: I mituri kapet me armë dhe sprej, intervenon Policia

Një rast shqetësues që përfshin të mitur është regjistruar në Ferizaj, ku një 14-vjeçar është kapur nga Policia me armë zjarri dhe sprej, gjatë orëve të para të mëngjesit të sotëm, raporton Gazeta Sinjali.

Siç njofton Policia, rasti ndodhi rreth orës 00:10, kur Policia e Stacionit në Ferizaj pranoi një informacion se një person po lëvizte me një armë zjarri dhe një sprej. Pas veprimeve të shpejta operative, njësia policore e ndaloi të dyshuarin, i cili rezultoi të jetë një i mitur vetëm 14 vjeç.

Gjatë kontrollit ndaj tij, Policia gjeti dhe sekuestroi një armë zjarri (pa fishek) dhe një sprej.

I mituri u shoqërua në stacionin policor në prani të prindit dhe avokatit mbrojtës të caktuar sipas detyrës zyrtare, ku është intervistuar në cilësinë e të dyshuarit. Me vendim të prokurorit kujdestar për të mitur, ai është liruar në procedurë të rregullt, ndërsa armët janë konfiskuar.

Nga Policia Rajonale e Ferizajt kanë apeluar për kujdes të shtuar ndaj fëmijëve, duke u bërë thirrje prindërve e komunitetit që të edukojnë të miturit për të qëndruar larg armëve dhe mjeteve të rrezikshme.

“Çdo përfshirje e të miturve në raste të tilla paraqet rrezik serioz për jetën e tyre dhe të të tjerëve. Të kujdesemi së bashku për sigurinë e fëmijëve tanë – është përgjegjësi e të gjithëve!”, thuhet në reagimin e Policisë.