Ndërron jetë pedagogia Albana Kastrati

Ka ndërruar jetë pedagogia, Albana Kastrati Kullolli.

Më poshtë njoftimi i publikuar në media:

Një lajm i hidhur ka tronditur sot komunitetin akademik në Shkodër. Pas një beteje të gjatë me një sëmundje të rëndë, është ndarë nga jeta pedagogia dhe ekspertja e njohur, Albana Kullolli (Kastrati).

Albana ishte diplomuar në vitin 2004 në Fakultetin Ekonomik të Universitetit “Luigj Gurakuqi” të Shkodrës, në degën Financë–Kontabilitet. Menjëherë pas diplomimit, nisi karrierën si pedagoge në të njëjtin institucion.

Në vitet 2006–2008, ajo ndoqi studimet master në “Kontabilitet” pranë Universitetit të Tiranës, ndërsa më 19 janar 2017 mbrojti me sukses gradën shkencore “Doktor i Shkencave”.
Gjatë viteve të punës, Albana u shqua për përkushtimin dhe profesionalizmin e saj, duke marrë pjesë në trajnime profesionale, konferenca shkencore dhe duke publikuar artikuj të shumtë në fushën e kontabilitetit.

Prej tetorit të vitit 2017, ajo kontribuonte edhe si eksperte pranë Observatorit për të Drejtat e Fëmijëve në Shkodër, ku dha ndihmesë të çmuar në projekte me ndikim social.

Lajmin e trishtë për ndarjen nga jeta të Albanës e bëri publik bashkëshorti i saj, përmes një postimi në rrjetet sociale.

Albana Kullolli (Kastrati) do të kujtohet gjithmonë si një pedagoge e përkushtuar, profesioniste me integritet dhe njeri me vlera të rralla.