Spektakël boksi sonte në Londër: Usyk dhe Dubois përballen për titullin e kampionit absolut dhe 200 milionë euro

Sonte në Londër pritet një natë spektakolare boksi, ku Oleksandr Usyk dhe Daniel Dubois do të përballen në një nga sfidat më të mëdha të vitit. Dueli i shumëpritur për titullin e kampionit absolut në peshat e rënda do të zhvillohet në stadiumin Wembley, me fillim të planifikuar rreth orës 23:59.

Në lojë nuk është vetëm titulli botëror, por edhe një revansh me shumë emocione, pas përballjes së tyre të parë në gusht 2023 – ku Usyk e fitoi me ndërprerje në raundin e nëntë. Polemikat nga ajo ndeshje, veçanërisht goditja e diskutueshme e Dubois në raundin e pestë, kanë lënë pas tension dhe kërkesë për drejtësi nga ekipi i britanikut.

Usyk, që synon të bëhet kampion absolut për herë të tretë, mbetet favorit sipas analistëve për shkak të teknikës, përvojës dhe dominimit në ndeshjen e parë (88 goditje të sakta kundrejt 47 të Dubois). Nga ana tjetër, Dubois kërkon hakmarrje dhe titullin e parë absolut britanik që nga koha e Lennox Lewis.

Fondi i çmimeve për këtë duel kalon shifrën prej 200 milionë eurosh – me Usyk që pritet të arkëtojë rreth 122 milionë dhe Dubois rreth 65 milionë euro.

Ndërsa Usyk mbështetet në teknikën e tij dhe përvojën, Dubois vjen me fuqinë e tij shkatërruese – 95% e fitoreve të tij kanë ardhur me nokaut. Ekipi i tij ka paralajmëruar një qasje më agresive dhe më shumë presion në trup, duke shpresuar që mosha 38-vjeçare e Usykut do të jetë një faktor vendimtar në ring.