Prishet luhatësja në parkun e lojërave – lëndohen 6 persona
Një incident i rëndë ka ndodhur mbrëmë rreth orës 23:20 në rrugën “Fatmir Dibra” në Skenderaj, ku gjashtë persona, përfshirë tre të mitur, kanë pësuar lëndime trupore si pasojë e prishjes së një pajisjeje lodrash në një park argëtues.
Sipas raportit të Policisë së Kosovës, pesë nga të lënduarit janë gra dhe një është mashkull, të gjithë shtetas të Kosovës.
Fillimisht, ata janë dërguar në Qendrën Emergjente në Skenderaj për trajtim të menjëhershëm, ndërsa tre prej tyre, për shkak të natyrës më të rëndë të lëndimeve, janë transferuar në Spitalin e Mitrovicës për trajtim të mëtejshëm.
Policia ka intervistuar dy persona të dyshuar në lidhje me rastin – pronarin dhe një punëtor të parkut të lojërave. Me vendim të prokurorit kompetent, të dy janë liruar në procedurë të rregullt, ndërkohë që hetimet për këtë rast po vazhdojnë.
