Alarm për bombë në dasmë në Klinë

Një ngjarje e pazakontë ka ndodhur mbrëmë në fshatin Dollc të Klinës, ku është raportuar për një alarm për bombë në një dasmë që po mbahej në restorantin “Gezimi Imperial”, raporton Gazeta Sinjali.

Burime të Sinjalit brenda hetimeve bëjnë me dije se më 19 korrik 2025, rreth orës 18:30 Policia ka pranuar një email anonim, në të cilin një qytetar pretendonte se kishte informacione të sigurta për një bombë të vendosur në sallën e dasmës, organizuar nga H.T. rreth 60-vjeçar.

Policia e Klinës ka ndërhyrë menjëherë, duke evakuuar të gjithë dasmorët dhe duke siguruar perimetrin. Në vendin e ngjarjes janë thirrur edhe njësitë përkatëse, përfshirë Njësinë K-9, si dhe njësitë tjera relevante.

Rreth orës 21:40 është kryer kontrolli i detajuar i ambientit nga Njësia për Eksploziv dhe K-9, por nuk është gjetur asnjë mjet i dyshimtë apo shpërthyes. Pas verifikimeve, dasmorët janë lejuar të kthehen në sallë dhe ceremonia ka vazhduar.

Me urdhër të Prokurorit të Shtetit, rasti është iniciuar si “Lajmërim apo kallëzim i rremë”, ndërsa hetimet janë duke vazhduar për të identifikuar personin që ka dërguar emailin.