U kapën për lopë, ky është i arrestuari që kanosi komshiun

Një konflikt për çështje bagëtish ka degjeneruar në kanosje serioze me armë zjarri mbrëmë në fshatin Likoc të Skenderajt, ku një burrë ka përfunduar në pranga, raporton Gazeta Sinjali.

Burime të sigurta të Sinjalit bëjnë me dije se personi i arrestuar është Bastri Veseli rreth 60-vjeçar, i cili pas një përplasjeje verbale me fqinin e tij A.H. rreth 37-vjeçar, dyshohet se e ka kërcënuar për jetë duke e sfiduar me fjalët:“Nuk ma nin për ty, i matim forcat kur të duash.”

Pas kësaj, Veseli ka repertuar një pushkë gjahu, të cilën e mbante me vete, duke krijuar situatë të rrezikshme për viktimën.

Policia ka ndërhyrë menjëherë në vendngjarje dhe me urdhër të Prokurorit të Shtetit ka bastisur shtëpinë e të dyshuarit, ku është gjetur dhe sekuestruar një armë gjahu e tipit Escort Magnum, kalibër 12mm, me 22 fishekë.

I dyshuari është shoqëruar në stacion policor dhe pas intervistimit, është ndaluar për 48 orë, ndërsa ndaj tij është iniciuar procedurë penale për: – “Kanosje” – “Mbajtje në pronësi, kontroll ose posedim të paautorizuar të armëve”.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.