Shoqërohet në polici pronari i lojrave për “Shkaktim të rrezikut të përgjithshëm”

Një incident me pasoja për sigurinë e qytetarëve ka ndodhur mbrëmë në rrugën “Fatmir Dibra” në Skenderaj, ku gjashtë persona kanë pësuar lëndime si pasojë e rrëzimit nga pajisjet e lojërave, raporton Gazeta Sinjali.

Burime të Sinjalit brenda hetimeve bëjnë me dije se më 19 korrik 2025, rreth orës 23:20, Policia është njoftuar për një rast në të cilin disa persona kishin pësuar lëndime trupore në një zonë me lojëra (hulaja), pasi këto të fundit ishin dëmtuar dhe ishin shkëputur gjatë përdorimit.

Në vendin e ngjarjes kanë dalë patrullat policore dhe njësitë hetimore bashkë me Inspektoratin e Punës. Nga informacionet zyrtare, rezulton se gjashtë persona kanë kërkuar trajtim mjekësor në QKMF Skenderaj, ndërsa tre prej tyre janë dërguar për trajtimin e mëtejshëm në Spitalin Rajonal të Mitrovicës. Mjekët kanë konstatuar lëndime të lehta trupore.

Personat e lënduar janë identifikuar si: – G.H. rreth 21-vjeçar – D.A. rreth 21-vjeçar – V.H. rreth 17-vjeçar – E.H. rreth 13-vjeçar – E.A. rreth 25-vjeçar – E.H. rreth 11-vjeçar.

Lidhur me rastin janë intervistuar dy persona: – I.K. rreth 50-vjeçar – pronar i lojërave – E.K. rreth 20-vjeçar punëtor në vendin e ngjarjes.

Pas konsultimit me Prokurorin e Shtetit, është inicuar rasti penal për veprën “Shkaktim i rrezikut të përgjithshëm”, ndërsa të dyshuarit janë liruar në procedurë të rregullt.