Albin Kurti nuk i ka numrat: Çka ndodhi në takimin me Fatmir Limajn?!
Vetëvendosje e Albin Kurtit nuk i ka numrat as për kryetar të Kuvendit e as për Qeveri, raporton Gazeta Blic.
As takimi i shumëpritur me liderin e Nismës Socialdemokrate, Fatmir Limaj, nuk prodhoi rezultat.
Gazeta Blic nga burime të saja, merr vesh se Kurti edhe nëse arrin marrëveshje me Limajn, nuk i mjaftojnë tri votat e Nismës Socialdemokrate për ta zgjedhur kryetarin e Kuvendit e as për ta formuar Qeverinë.
“As nesër nuk pritet të zgjedhet kryetari i Kuvendit. Vetëvendosje nuk i ka votat”, thonë burimet.
Por, çka ndodhi në takimin e djeshëm ndërmjet Limajt e Kurtit?!
Gazeta Blic ka mësuar se në këtë takim nuk është biseduar fare për poste.
“Nuk kanë shkuar bisedimet deri në atë fazë”, thonë burimet.
Kurti e Limaj kanë biseduar se si të dilet nga kriza politike.
Gazeta Blic merr vesh që lideri i Nismës, Fatmir Limaj t’i ketë thënë Kurtit “se pasi t’i bësh 58 vota, pastaj bisedojmë për marrëveshje konkrete”.
Në anën tjetër, as nga Lëvizja Vetëvendosje e as nga Nisma nuk kanë dashur të flasin zyrtarisht për takimin e djeshëm.
“Sot, nuk pritet ndonjë takim ndërmjet Kurtit e Limajt”, i tha Gazetës Blic një burim brenda Vetëvendosjes.
Nisma, si kusht për të hyrë në bashkëqeverisje me Vetëvendosjen e ka postin e kreytarit të Kuvendit, më saktësisht lideri i partisë, Fatmir Limaj kërkon ta marrë postin e kryekuvendarit.
Ndryshe, nesër është tentativa e 50-të për zgjedhjen e kryetarit të Kuvendit.
Lëvizja Vetëvendosje këmbëngul që Albulena Haxhiu duhet të jetë kryetare e Kuvendit, derisa partitë tjera janë zotuar se do të votinin për një kandidat tjetër nga partia e Kurtit.
Kosova tash e sa muaj nga përfundimi i zgjedhjeve vazhdon të jetë në bllokadë institucionale./ Gazeta Blic
