E mitura bashkëjeton me gruan që dyshohet se e rreh – Viktima me lëndime në trup, ndërhyn policia

Një rast i rëndë i dhunës në familje është raportuar në fshatin Brestovik të Pejës, ku një vajzë e mitur ka deklaruar se është në bashkëjetesë jashtëmartesore me një grua, e cila dyshohet se ushtron dhunë fizike ndaj saj.

Burime të Sinjalit bëjnë me dije se më 20 korrik 2025, rreth orës 11:30, patrulla policore ka intervenuar pas raportimit për dhunë në një familje. Në vendin e ngjarjes, policia ka gjetur viktimën, rreth 16 vjeçare, e cila ka deklaruar se për një kohë të gjatë është në bashkëjetesë me të dyshuarën B. K. rreth 22-vjeçare dhe se kjo e fundit ka ushtruar vazhdimisht dhunë fizike ndaj saj.

Sipas të njëjtave burime, në trupin e të miturës janë vërejtur lëndime të dukshme, por ajo ka refuzuar trajtimin mjekësor.

Të dyja palët janë shoqëruar në stacionin policor ku janë intervistuar nga njësia e hetimeve. Me urdhër të Prokurorit të Shtetit, ndaj të dyshuarës është iniciuar procedurë penale për “Dhunë në familje” dhe “Bashkëjetesë jashtëmartesore me personin nën moshën 16-vjeçare”.