“Avullohen” 3 kg ari te “Kamberi Gold” në Prishtinë

Një vjedhje e rëndë ka ndodhur mëngjesin e sotëm në zemër të Prishtinës, saktësisht në rrugën “Agim Ramadani”, ku cak i hajnave ka qenë argjendaria “Kamberi Gold”.

Burime të Gazetës Sinjali brenda hetimeve bëjnë me dije se sot, rreth orës 09:00, policia në kryeqytet ka pranuar një informacion se nga brenda lokalit janë vjedhur rreth 3 kilogramë ar, me vlerë të konsiderueshme materiale.

Rastin e ka denoncuar pronari i argjendarisë, N.K. (1967), i cili ka kërkuar ndihmën e Policisë për të identifikuar dhe kapur autorin/autorët e kësaj vjedhjeje të sofistikuar.

Pas pranimit të informatës, në vendin e ngjarjes kanë dalë njësitë policore, hetuesit rajonalë dhe forenzika. Pas ekzaminimeve në terren dhe dokumentimit të rastit, është iniciuar procedura hetimore për veprën penale “Vjedhje e rëndë”.

Deri më tani, nuk ka të dyshuar të identifikuar, por hetimet janë në zhvillim e sipër. Policia po shqyrton të gjitha provat e siguruara dhe pamjet nga kamerat e sigurisë dhe pritet që ato të ndihmojnë në zbardhjen e rastit.