Rrahje në kafiteri për një postim në rrjete sociale

Një mosmarrëveshje që kishte si shkak një postim në rrjete sociale ka përfunduar me rrahje dhe arrestim në qytetin e Shtimes.

Burimet e Sinjalit bëjnë me dije se rasti ka ndodhur më 21 korrik 2025, rreth orës 20:30, në rrugën “Ahmet Shtimja”, saktësisht në një kafiteri në afërsi të objektit të njohur si “te Bedrija”.

Sipas informatave nga hetuesia, në këtë lokacion ka ndodhur një përleshje fizike mes disa personave, ku si pasojë një person ka pësuar lëndime të lehta trupore dhe është dërguar për trajtim mjekësor në Shtëpinë e Shëndetit në Shtime.

Policia ka reaguar menjëherë dhe ka shoqëruar personat e përfshirë në stacionin policor për intervistim. Gjatë fazës së hetimit, është konstatuar se motivi i sulmit kishte të bënte me një storie të publikuar nga viktima në rrjetet sociale, që dyshohet se ka nxitur reagimin agresiv të njërit prej të përfshirëve.

I dyshuari M.N. është ndaluar për 48 orë me urdhër të Prokurores kujdestare, ndërsa rasti është kualifikuar si “Lëndim i lehtë trupor”, sipas Kodit Penal të Republikës së Kosovës.

Hetimet janë duke vazhduar për të sqaruar plotësisht rrethanat e rastit.