Zhduket vetura pas kërcënimit për një borxh në Prishtinë

Një ngjarje e pazakontë është raportuar mbrëmjen e së hënës në Prishtinë, ku një burrë ka njoftuar Policinë se pas një konflikti për një borxh, vetura e tij është marrë në rrethana të dyshimta.

Burime të Sinjalit brenda Prokurorisë bëjnë me dije se më 21 korrik 2025, pas orës 18:30, është raportuar se në rrugën “Zagrebi”, afër “Lulishtes” dhe Italian Petrol, disa persona të panjohur kishin marrë një veturë tip “Golf” dhe ishin larguar në drejtim të panjohur.

Policia ka dalë menjëherë në vendin e ngjarjes, ku ka takuar ankuesin A.K. (1974), i cili ka deklaruar se ka një borxh prej 500 euro ndaj një personi, por nuk ka dashur të zbulojë emrin e tij. Sipas tij, kishte afat deri në fund të muajit për ta kthyer shumën.

Pas deklarimeve të para, me urdhër të Prokurorit kujdestar, rasti është inicializuar për dy vepra penale: Kanosje, sipas nenit 181 të KPRK-së, Vjedhje, sipas nenit 314 të KPRK-së.

Mirëpo rreth orës 22:15, ankuesi është paraqitur sërish në stacionin policor, duke njoftuar se vetura e tij është gjetur në parkingun e HIB Petrol në Shkabaj.

Njësia e hetimeve dhe Policia me uniformë kanë shkuar në vendin ku ndodhej vetura dhe kanë ndërmarrë veprimet për sekuestrim dhe ekzaminim të saj si provë materiale.

Hetimet po vazhdojnë për zbardhjen e rastit dhe identifikimin e të dyshuarve.