E dhimbshme: Fëmija 2 vjeçar ndërron jetë, kishte temperaturë të lartë

Ditën e djeshme, JOQ ALBANIA publikoi denoncimin e një nëne për neglizhencën dhe kushtet e spitalit pediatrik në Vlorë.

Më vonë gjatë mbrëmjes, qytetarët raportuan në JOQ ALBANIA për një fëmijë që kishte ndërruar jetë në ambientet e këtij spitali. Pas hetimeve të kryera dhe krahasimit të denoncimeve, JOQ ALBANIA ka mësuar se bëhet fjalë për një rast tjetër, po kaq tragjik.

Fëmija që ka ndërruar jetë në spitalin e Vlorës ka mbërritur në urgjencë në gjendje kritike, me temperaturë shumë të lartë, shenja konvulsionesh dhe pa frymëmarrje.

Sipas mjekëve fëmijës i është dhënë ndihma e parë emergjente, përfshirë masazhi kardiak dhe frymëmarrja artificiale, është vendosur në reanimacion, ka marrë oksigjen dhe mjekim të specializuar. Janë kryer analizat përkatëse, rezonanca e trurit dhe çdo ndërhyrje e mundshme për të shpëtuar jetën e tij. Por pavarësisht përpjekjeve të stafit mjekësor, fëmija ka ndërruar jetë disa orë më vonë.

Për këtë rast, janë marrë edhe mostrat biologjike për të përcaktuar shkakun dhe është komunikuar me Institutin e Shëndetit Publik për vijimin e hetimeve epidemiologjike.

JOQ ALBANIA kërkon të sqarojë opinionin publik për situatën e krijuar dhe fton të gjithë qytetarët të raportojnë çdo problematikë lidhur me neglizhencat dhe kushtet e sistemit shëndetësor në vend, që duhet thënë se është shumë larg propagandës në rrjetet sociale.

Gjithashtu në këto temperatura të larta, prindërit duhet të tregojnë kujdes ndaj të vegjëlve të tyre dhe çdo komplikacioni që shfaqin.