Duda Balje zbulon propozimin e Limajt
Nesër pritet të mbahet seanca e 52-të e Kuvendit, një seancë kyçe që plotëson afatin kushtetues prej 30 ditësh, siç është përcaktuar nga Gjykata Kushtetuese. Në fokus të saj është zgjedhja e kryeparlamentarit, por gjithçka mbetet pezull për shkak të mungesës së votave.
Pavarësisht nisjes së bisedimeve mes Lëvizjes Vetëvendosje të Albin Kurtit dhe NISMA-s së Fatmir Limajt, kalkulimet aktuale tregojnë se arrihen vetëm 60 vota, 1 më pak nga minimumi i nevojshëm për të zgjedhur kryetarin e Kuvendit.
Një nga çelësat e kësaj bllokade është edhe deputetja boshnjake Duda Balje, e cila vazhdon të mbajë qëndrim të prerë, nuk mbështet Kurtin dhe nuk do poste politike.
Në një intervistë për Indeksonline, Balje thekson se ka marrë ofertë nga Fatmir Limaj, por se nuk do të lëvizë nga vendimi i saj. Ajo thekson se nuk ka besim te Albin Kurti, dhe se bashkëpunimi mes tyre është i pamundur.
“Me Fatmirin kemi biseduar, por me Vetëvendosjen jo. Jam një person që nuk lëviz me vendimin. Ai e ka kuptuar arsyetimin tim.”
“Jo kurgjo, veç ai (Fatmir Limaj v.j.) ka thënë: ‘a ka mundësi me bisedu, a don naj pozitë, a naj sen?’ – Unë s’du pozitë, s’du kurgjo, kërkesa ka qenë për boshnjakët.”
“Unë nuk mundem me bashkëpunu me Albin Kurtin sepse nuk kam besim – s’mundesh me punu me dikë që s’ki besim, edhe ai s’ka besim tek unë.”
“Ka fillu një luftë personale ndaj meje – për herë të parë në histori ka nisë një betejë personale ndaj një deputeteje.”
Deputetja përmend gjithashtu një deklaratë të deputetit të LVV-së, Arbër Rexhaj, i cili sipas saj, ka thënë publikisht se “në Këshillin e Sigurisë është fol për Dudën”. Ajo e konsideron këtë si shqetësim të madh dhe pyet. “A e dini çka është Këshilli i Sigurisë? Qysh një deputet me pas informacion prej andej?”
Balje thekson se për të, komuna për komunitetin boshnjak është kërkesa kryesore, jo postet apo benefitet personale. /Indeksonline/
