Makazze, ylli i skenës globale në CS2

Ylli kosovar i CS2, Drin “makazze” Shaqiri, ka tërhequr vëmendje të madhe në skenën globale të kësaj loje.

Ai u shpall kampion i ESL Pro League me skuadrën e tij, Na’Vi, pasi mposhtën në finale me rezultat 3-1 skuadrën e Auroras. Në këtë finale, “makazze” ishte lojtari më i dalluar i ekipit, duke u shpallur edhe ‘Lojtari i Turneut’.

Se “makazze” është një pjesë kyçe e Na’Vi, e ka konfirmuar bashkëlojtari i tij, Aleksi “Aleksib” Virolainen. Ai ka theksuar se pa yllin kosovar, fitorja për Na’Vi do të ishte shumë më e vështirë për t’u arritur, për shkak të rolit të tij në skuadër.

“Ai gjithmonë është i rëndësishëm. Nëse nuk shfaqet, loja jonë bëhet më e vështirë, sepse është një playmaker dhe kontrollon zona shumë të rëndësishme,” ka thënë AleksiB.

Më tej, bashkëlojtari i tij komentoi performancën dhe qetësinë e “makazze” gjatë finales:

“Sipas mënyrës që e shoh të lëviz tani, besimi shtesë që ka, shumë lojtarë mund të ndihen të nervozuar kur luajnë kundër ish-ekipit të tyre, sidomos dikush kaq i ri, por ai nuk dukej aspak i nervozuar.”

Na’Vi do të rikthehet sërish në aksion sot (e mërkurë), ku do të ndeshen me ekipin B8 në kuadër të turneut BLAST Open Rotterdam, me fillim nga ora 13:30.