EKSKLUZIVE: Nëse edhe nesër dështon konstituimi mund të kemi zgjedhje

Ambasada gjermane në Kosovë ka njoftuar se ambasadori gjerman Jorn Rohde, më 25.07.2025, do të përcjell nga afër seancën konstituive të Kuvendit të Kosovës.

Sipas Ambasadës, së bashku me Rohden do të jenë edhe ‘kolegë tjerë ndërkombëtarë’.

“Për shkak se nesër është mundësia e fundit për t’u konstituuar Kuvendi, para afatit të Gjykatës Kushtetuese, Ambasadori Rohde, së bashku me kolegë tjerë ndërkombëtarë, planifikojnë të marrin pjesë në mbledhjen e Parlamentit” – thuhet mes tjerash në njoftimin e Ambasadës gjermane.

Më 25.07.2025 Kuvendi i Kosovës tenton për herën e 52-të konstituimin e tij, në seancën konstituive të filluar më 15.04.2025.

Kjo është seanca konstituive e legjislaturës së nëntë të Kuvendit të Kosovës.

Gjykata Kushtetuese u ka dhënë deputetëve afat 30 ditor për konstituimin e Kuvendit.

Nga njohës të Kushtetutës së Kosovës thuhet se nëse dështon edhe nesër konstituimi, vendi do të shkojë në zgjedhje, pasi deputetët të humbin mandatet e tyre.