Gjykata Supreme konfirmon dënimin për sulm seksual të stomatologut Xhavit Muqiqi

Gjykata Supreme ka konfirmuar se vendimi për dënimin me një vit burg ndaj stomatologut Xhavit Muqiqi ishte i drejtë.

Gjykata Themelore e Prishtinës kishte shpallur për të tretën herë fajtor mjekun e Stomatologjisë, Xhavit Muqiqi, dhe i kishte shqiptuar aktgjykim dënues me një vit burgim.

Muqiqi akuzohej për veprën penale “Keqpërdorimi seksual i personave nën moshën gjashtëmbëdhjetë vjet”.

Pas këtij vendimi, mbrojtja e të dënuarit kishte bërë ankesë kundër aktgjykimit të Gjykatës Themelore, por kjo është refuzuar.

“AKTGJYKIM REFUZOHET si e pabazuar kërkesa për mbrojtje të ligjshmërisë e mbrojtësit të dënuarit Xhavit Muqiqi, e paraqitur kundër aktgjykimit të Gjykatës Themelore në Prishtinë – Departamenti për të Mitur PM.nr.89/2022 të datës 27.02.2023 dhe aktgjykimit të Gjykatës së Apelit të Kosovës PAKR.nr.246/2023 të datës 18.07.2024”, thuhet në vendimin e Supremes që ka siguruar Sinjali.

Muqiqi, në vitin 2012, kishte keqpërdorur seksualisht pacienten e tij, e cila në kohën kur ka ndodhur rasti ishte vetëm 15 vjeçare.

Sipas aktgjykimit që ka sigurar Sinjali, i cili mban datën 9 korrik 2025, kërkesa e mbrojtjes është vlerësuar si e pabazuar, duke u konfirmuar aktgjykimet e Gjykatës Themelore në Prishtinë dhe asaj të Apelit.

Muqiqi ishte dënuar me një vit burgim, dënim i cili do të ekzekutohet në tërësi, duke llogaritur edhe kohën e kaluar në arrest shtëpiak nga 21 janari 2012 deri më 17 prill 2019.

Në vendim thuhet se, përveç burgimit, i dënuari është i obliguar të paguajë shpenzimet e procedurës penale dhe shumën prej 1,000 euro si tarifë gjyqësore, ndërsa në emër të Fondit për Kompensimin e Viktimave të Krimit duhet të paguajë 50 euro.

Më 09 janar të këtij viti, Sinjali pati siguruar edhe aktgjykimin e Apelit për këtë rast ku thuhet se Gjykata e gjykon të akuzuarin me një vit burgim, por dënimi i shqiptuar nuk do të ekzekutohet nëse i akuzuari nuk kryen vepër tjetër penale në periudhën kohore prej dy viteve.

Ndërsa, aktgjykimi i Gjykatës Themelore në Prishtinë i datës 27 shkurt 2023, është ndryshuar sa i përket cilësimit juridik të veprës penale, ashtu që kjo gjykatë, veprimet e të akuzuarit i cilëson si vepër penale sulmi seksual.

Për këtë rast të tmerrshëm ku ishte përfshirë Xhavit Muqiqi, avokati i palës së dëmtuar, Besnik Berisha, kishte kërkuar që të ndryshohej aktgjykimi dhe të ashpërsohej lartësia e sanksionit penal me burgim të shqiptuar kundër Muqiqit.

Ky rast ishte hetuar qe 13 vite dhe viktima kërkonte drejtësi dhe dënim të merituar për Xhavit Muqiqin.

Stomatologu kishte abuzuar seksualisht me të miturën pasi kjo e fundit kishte shkuar të marrë tretman mjekësor, në mesditën e 21 janarit të vitit 2012, në ordinancën e tij.

Muqiqi akuzohet se pasi ia kishte dhënë anestezionin të miturës kishte filluar ta përkëdhelë, ta puthë dhe e kishte urdhëruar të ulet në prehrin e tij.

“Xhavit Muqiq në cilësinë e mjekut – stomatolog ia kishte dhënë anestezionin, i njëjti kishte filluar me pyetje jo të zakonshme si janë : “Çka, është më e rëndësishme për jetën e saj dhe çka do të thotë fjala intuitë dhe njëkohësisht kishte filluar ta ledhatonte në pjesën e qafës, e kishte puthur të njëjtën në gojë, ku e dëmtuara ka filluar të largohet nga i pandehuri por i njëjti i kishte thënë “se është i besueshëm dhe për çdo problem do t’i ndihmoj edhe për anën financiare”, pastaj i njëjti është ngritur në këmbë duke e ulur të dëmtuarën dy herë në prehrin e tij”, thuhej në aktakuzë.

E mitura kishte tentuar të largohej nga doktori, mirëpo ai pa pëlqimin e saj kishte filluar ta përqafojë duke e shtrënguar.

“…pas përpjekjeve largohet nga i pandehurit  dhe nga i njëjti ka kërkuar ta dijë se a ka përfunduar intervenimin e dhëmbit ku në dalje nga ordinanca përsëri i njëjti pa pëlqimin e saj ka filluar ta përqafonte duke e shtrënguar për kraharori me ç’rast tek e dëmtuara e mitur ka shkaktuar shqetësim”.