I plagosuri në Prishtinë është 36 vjeçar

Një incident me armë zjarri ka ndodhur mbrëmjen e së enjtes në rrugën “Ferid Curri” në Prishtinë, ku një person është plagosur dhe një tjetër është arrestuar nga Policia e Kosovës, transmeton IndeksOnline.

Sipas raportit zyrtar, rreth orës 23:10, i dyshuari mashkull kosovar ka shtënë me armë zjarri në drejtim të viktimës B.H., rreth 36-vjeç. Viktima është dërguar menjëherë në Qendrën Klinike Universitare të Kosovës për trajtim mjekësor.

Në vendin e ngjarjes, njësitë policore kanë gjetur dhe sekuestruar 14 gëzhoja dhe 11 fragmente të predhave. Po ashtu, nga i dyshuari është sekuestruar një armë zjarri me një karikator dhe tre fishekë.

Pas intervistimit, me vendim të prokurorit, i dyshuari është dërguar në mbajtje, ndërsa hetimet rreth motivit të ngjarjes dhe rrethanave tjera po vazhdojnë.

Policia e Kosovës ka theksuar se do të vazhdojë angazhimin maksimal për të garantuar sigurinë e qytetarëve dhe parandalimin e përdorimit të armëve të zjarrit./IndeksOnline/