Aksident tragjik hekurudhor në Gjermani – disa të vdekur dhe të plagosur

Në landin gjerman Baden-Württemberg ka ndodhur një aksident i rëndë hekurudhor, ku një tren pasagjerësh ka dalë nga shinat.

Siç raporton Bild.de, transmeton PodujevaSot, në këtë aksident kanë humbur jetën disa persona, ndërsa të tjerë janë plagosur.

Ngjarja ndodhi të shtunën në afërsi të qytetit Langenargen, në liqenin e Konstancës. Për momentin nuk dihet saktësisht se sa persona kanë humbur jetën, por sipas raportimeve të para nga vendi i ngjarjes, numri i viktimave pritet të rritet.

Sipas policisë dhe shërbimeve emergjente, një pjesë e trenit ka dalë nga shinat dhe është përmbysur.

Në vendin e ngjarjes kanë mbërritur ekipe të shumta shpëtimi, përfshirë zjarrfikës, policë dhe helikopterë të ndihmës së shpejtë.

Shkaqet e aksidentit ende nuk janë sqaruar. Hetimet janë duke vazhduar intensivisht, ndërsa autoritetet kanë bërë thirrje që qytetarët të shmangin zonën për të mos penguar operacionet e shpëtimit.