Ekskluzive: E shtyu motrën nga kati i dytë – arrestohet burri dhe dërgohet për trajtim psikiatrik

Një ngjarje e rëndë është regjistruar të dielën në fshatin Poterq të Klinës, ku dyshohet se një burrë ka ushtruar dhunë të rëndë ndaj motrës së tij.

Burime të Sinjalit bëjnë me dije se rreth orës 12:30, Policia është njoftuar për një incident në familjen Z, ku dyshohet se B. Z. e ka shtyrë motrën e tij, G.Z. nga kati i dytë i shtëpisë, duke e hedhur nga dritarja.

Si pasojë, viktima ka pësuar lëndime të rënda trupore dhe është dërguar me urgjencë në Spitalin e Pejës.

Policia ka ndërhyrë menjëherë dhe pas refuzimit të të dyshuarit për të hapur derën e dhomës ku ishte mbyllur, është dashur të intervenohet me forcë për arrestimin e tij.

Në vendngjarje ka dalë edhe një psikiatër, i cili ka konstatuar se i dyshuari nuk është në gjendje për të dhënë deklaratë dhe me vendim të Prokurores kujdestare, ai është dërguar për tretman të menjëhershëm psikiatrik në Spitalin e Pejës.

Ndaj tij është iniciuar rasti “Lëndim i rëndë trupor” në kuadër të dhunës në familje, ndërsa është caktuar masa e ndalimit për 48 orë.