Arrestohen dy mërgimtarët që ‘terrorizuan’ një familje

Të shtunën në mesditë, në rrugën Istog–Pejë, ka ndodhur një incident i rëndë në komunikacion, ku dy persona që udhëtonin me një veturë të tipit BMW me targa të huaja VD 602 148 kanë kryer një tejkalim të rrezikshëm në një kolonë të gjatë automjetesh, duke rrezikuar seriozisht sigurinë në trafik.
Pasi i kanë dalë përpara një veture tjetër dhe kanë frenuar papritur, personat nga BMW-ja kanë filluar fillimisht ta sulmojnë veturën e ndalur me shishe uji.
Sipas pamjeve të siguruara, nga BMW-ja kanë dalë dy persona, të cilët janë sulur drejt veturës tjetër, brenda së cilës ndodheshin një burrë, një grua dhe një fëmijë pesëvjeçar.
Ata kanë fyer dhe kërcënuar familjen, duke shkaktuar shqetësim dhe panik, ndërsa në largim, kanë hedhur edhe një shishe tjetër në drejtim të veturës, duke dëmtuar xhamin.
Pala e sulmuar e ka paraqitur menjëherë rastin në Policinë e Istogut, duke dorëzuar edhe videon e incidentit si provë.
Autoritetet kanë vepruar me shpejtësi duke identifikuar dhe intervistuar të përfshirët.
Zëdhënësi i Policisë për Rajonin e Pejës, Shkodran Nikçi, ka konfirmuar për Peja në Fokus se dy personat e dyshuar janë arrestuar.
“Mund të ju konfirmojmë se dy personat e dyshuar të këtij rasti janë intervistuar dhe më pas, me urdhër të Prokurorit të Shtetit, janë ndaluar për 48 orë. Ata janë ngarkuar me veprat penale sulm dhe ngacmim,” – tha Nikçi për Peja në Fokus.
Ngjarja ka shkaktuar reagime të shumta në opinion për shkak të sjelljes së dhunshme të dy personave dhe prania e familjes në veturën e sulmuar, duke rikthyer vëmendjen mbi nevojën për sjellje të përgjegjshme në trafik dhe ndëshkimin e rasteve të tilla me seriozitet./Pejanefokus