Vjosa Osmani: Katastrofa humanitare në Gazë dhe vuajtjet e civilëve duhet të ndalojnë

Presidentja e Kosovës, Vjosa Osmani, ka deklaruar se gjendja në Rripin e Gazës është një katastrofë humanitare dhe se vuajtjet e civilëve të pafajshëm, veçanërisht fëmijëve – duhet të marrin fund sa më parë.

Ajo theksoi se Kosova mbështet fuqishëm përpjekjet e Shteteve të Bashkuara, Katarit dhe Egjiptit për të arritur një armëpushim dhe për lirimin e menjëhershëm të të gjitha pengjeve.

“Fëmijët kurrë s’i nisin luftërat! Por, janë ata që vuajnë më së tepërmi dhe i bartin pasojat më të mëdha të çdo konflikti. Katastrofa humanitare në Gaza dhe vuajtjet e civilëve të pafajshëm, veçanërisht fëmijëve, është zemërthyese dhe duhet të marrë fund. Çdo fëmijë, çdo familje, pavarësisht nacionalitetit apo fesë, është e çmuar dhe duhet të mbrohet. Ne përkrahim plotësisht përpjekjet për armëpushim të udhëhequra nga SHBA-ja, Katari dhe Egjipti, përfshirë përpjekjet për lirimin e menjëhershëm të të gjitha pengjeve. Në ndërkohë, sigurimi i qasjes ndaj ushqimit, ujit dhe barnave për më të cenueshmit duhet të jetë prioritet kyç për ta zbutuar vuajtjen në mesin e të pafajshmëve të shkaktuar nga lufta”, ka shkruar Osmani në platformën “X”.

Ajo ka thënë se përkrah angazhimin ndërkombëtar për arritjen e një paqeje të drejtë dhe të qëndrueshme, ku si izraelitët ashtu edhe palestinezët mund të jetonin në dinjitet, siguri dhe respekt të ndërsjellë.