E rëndë: Fëmija i mërgimtarit lëndohet në lodrat e një restoranti

Një mërgimtar nga Finlanda, i cili kishte ardhur për pushime në Mitrovicë, ka hapur një rast në Polici pasi fëmija i tij ka pësuar lëndime në të dyja këmbët si pasojë e një lodre të dëmtuar në një restorant pranë Liqenit në Mitrovicë.

Sipas rrëfimit të tij për “Jepi zë”, incidenti ka ndodhur gjatë një vizite familjare, kur fëmija ishte duke luajtur në këndin e lojërave të lokalit dhe u lëndua nga një pajisje e prishur. Mërgimtari thotë se menjëherë pas ngjarjes e kishte njoftuar pronarin e lokalit, duke kërkuar që pajisja të largohej për të parandaluar lëndime të tjera, por ajo nuk është hequr as pas një jave. Edhe pas dy javësh, kur ai është kthyer në të njëjtin vend, ka konstatuar se lodrat e dëmtuara vazhdonin të ishin aty, ndërsa fëmijë të tjerë luanin pranë tyre.

Ai ka shprehur shqetësimin për mungesën e përgjegjësisë dhe ka theksuar se në vendet perëndimore, si Finlanda, reagimi do të ishte i menjëhershëm për të parandaluar rrezikun ndaj fëmijëve.

“Çdo ditë po lëndohen fëmijë dhe askush nuk jep përgjegjësi. Sa më shpejt të ndërmerret diçka, aq më pak fëmijë do të lëndohen,” ka deklaruar ai.

Rasti është raportuar në Polici, por sipas mërgimtarit, deri më tani nuk është ndërmarrë asnjë veprim konkret nga autoritetet për ta trajtuar problemin./ Jepi zë